Musika munduan ibilbide luzea egin duen trikitilari honek, bere kantu eta konposaketa propioak kaleratu ditu Denboraren naufrago izenburua duen diskoan. Era honetan Portugaletekoa den musikari honek azken urteetan egindako lanak argia ikusi du.

Disko honetan, erritmo eta konposaketa berriekin, trikitixaren doinuak berritu ditu. Bere estilo propioa garatu du, baina beti ere nondik datorren ahaztu gabe. Horretarako ñabarduraz beteriko kantuak egin ditu, non trikitixa beste musika-tresna batzuekin uztartzen duen. Alde batetik, folk musikaren mundutik datozen instrumentuak entzungo ditugu, hala nola, biolina, mandolina, alboka, txalaparta, whistle-a edo dobroa. Bestetik, estandarragoak diren musika-tresnak ere erabili ditu: gitarra, baxua, kontrabaxua, biolontzeloa, pianoa, bateria,..

12 piezaz osatutako lan honetan, pieza instrumentalen zein abestutako piezen bidez, entzuleari irudimenezko bidaia batean murgiltzera gonbidatzen gaitu Xabik. Kantu bakoitza leku ezberdin batean dago oinarrituta, eta hauek dakartzaten testuek istorioan eta kantuan barneratzen laguntzen digute.

1. Breakfast in Belfast
2. Albokaria
3. Ezkontza behartua
4. Perledo
5. Lago di Como
6. Waltz for Bille
7. Chichén Itzá
8. BI-5382-CB
9. Bossa nostra
10. Denboraren naufrago
11. Ze dino ba!
12. Zu gabe

Aurretik ere badu esperientzia mota honetako proiektuetan, izan ere 2007an "Bizkaiko Trikitixa" izeneko diskoa kaleratu zuen. Horrez gain, Oskorri taldearekin kolaboratzen du, 2004ko Ibilaldiko kanta egin du, Bermeoko jaietakoa,..

Orain dela urte batzuk hasi zen Xabi lan honetan, eta geroztik konposaketa eta moldaketa ugari egin ditu. Bere inguruko musikariez lagunduta, jendaurreko emanaldietan eskaini ditu, eta publikoaren harrera ezin hobea izan dute. Urteak pasata, eta bitartean beste proiektu musikal askotan murgilduta egon ondoren, 2009an kantu horiekin osatutako diskoa kaleratzea erabaki du Xabik.

"Denboraren naufrago" Elkar estudioan 2009ko martxoan zehar grabatua izan da. Hala ere, azken grabaketa batzuk, nahasketak eta masterizazioa Musikart estudioan egin dira. Lan honen ekoizle artistikoa eta soinu teknikaria Mikel Fernandez Krutzaga izan da (Grammy baten irabazlea den soinu ingeniaria).

"Denboraren naufrago" –ko musika guztia Xabi Aburruzagarena da, Bossa Nostra izan ezik; azken hau Eloy Urrejolarena da. Kanten letrak Iñaki Aurrekoetxearenak dira eta testuak Kirmen Uriberenak. Era berean, disko honetan hainbat musikari eta kolaboratzailek parte hartu dute.